فرنسا توقف مؤثرين جزائريين.. تصعيد جديد؟

السلام عليكم خاوتي، فرنسا عاودت زادت من التوقيفات ضد المؤثرين الجزائريين، وآخرهم رفيق. ك لي قالو عليه كان يدعو للعنف في فرنسا. هاذ الشي زاد يعمّق الأزمة بين البلدين، خصوصا بعد التوقيفات السابقة والمؤثر نعمان بوعلام لي فرنسا حبستو ورحلاتو للجزائر، بصح الجزائر رجعتو لباريس في نفس النهار! شكون فهم شكون؟ خليونا نفهمو القصة مع بعض.

من بداية جانفي، فرنسا دايرة حملة ضد بعض المؤثرين الجزائريين، وتقول باللي كاين ناس في تيك توك يحرضو على العنف. وزير الداخلية الفرنسي برونو ريتايو قال بالحرف الواحد "ما راحش نتسامحو مع أي واحد"، وبصح كاين ناس تشوف باللي هاذ التوقيفات جزء من الضغط السياسي على الجزائر.

علاقات الجزائر وفرنسا معروفة بالشد والجذب، بصح زادت توترت كي فرنسا اعترفت بالحكم الذاتي للصحراء الغربية تحت سيادة المغرب. ومن بعد زاد الغليان بعد ما فرنسا رفضت مطالب الجزائر بالإفراج عن الكاتب بوعلام صنصال لي محبوس في الجزائر من نوفمبر الماضي.

أما نعمان بوعلام المعروف بـ"دولامن"، تفرج فيديو تحو قبل أيام، وتحبس، ومن بعد ترحلو الجزائر، بصح الجزائر رجعتو لباريس! وزير الداخلية الفرنسي قال باللي الجزائر حبّت "تهين فرنسا"، وحتى اقترح ينقصو التأشيرات على الجزائريين ويزيدو الضرائب على السلع الجزائرية، بصح الحكومة الفرنسية رفضت الفكرة.

من جهة أخرى، الجزائر نفت كل هاذي الادعاءات وقالت باللي اليمين المتطرف الفرنسي يشن حملة إعلامية ضدها، وما عندهاش نية لا في التصعيد لا في المزايدة.

وش رايكم خاوتي؟ هل فعلا فرنسا تخاف من المؤثرين الجزائريين وتحب تسكتهم؟ أم أن القضية عندها أبعاد سياسية كبيرة؟ وهل تشوفو باللي الجزائر كان لازم ترد على فرنسا بنفس الطريقة؟ جاوبونا في التعليقات، وخليونا نعرفو وش راي الشعب الجزائري في هاذ التطورات.

متنساوش تبارطاجيو الفيديو وتديرونا جام، والسلام عليكم!